Ikerketa batzordea (San antonio)

Posted on Actualizado enn

San antonio kaleko lokalen inguruko alokairuaren aritik sortutako udal ikerketa batzordeak martxoaren bukaeran egingo ditu publiko ondorioak.

2007ko otsailean, udal hauteskundeak ospatu baino hiru hilabete lehenago, San Antonio kaleko alokairua hitzartu zen, urteetan, Gasteizko udala baldintzatuko zuen alokairu baldintza arraroetan.

Hori dela eta, pasa den irailean sortu zen udalean ikerketa batzordea, eta bertan azalpenak eman dituzte hainbat pertsonak. Orduan alkate zenak gutun bidez eman zituen azalpenak.

Zazpi hilabete ondoren, batzordearen ondorioak jendarteratuko dituzte laister.

Anuncios

Ustelkeria kasuen inguruko jarraipena

Posted on Actualizado enn

Adi (3)Adi! ustelkeriaren aurkako elkartea egungo erralitateak eta batez ere gestio publikoaren kudeaketan ikusten diren ustelkeria kasuek kezkatuta, herritarrek egindako deiaren ondorioz sortu da. Jasotzen ditugun kasuen jarraipena egin eta irregulartasun zantzuak atzeman ezkero ikerketa abiatzeko asmoarekin.

“Orain arte, denon diruarekin, interes jakin batzuk saritu dituzte”

Minientrada Posted on Actualizado enn

Arabako Hitza (2014/02/14)

San Antonio kaleko lokalen afera tarteko, Gasteizko Udala “ustelkeria kasuetan” nahastuta dagoen susmoa piztu da. Hori dela eta, herritar talde bat bildu da haserrea agertu eta herritarrei erantzuteko eskaera egiteko; “kudeaketa eredu gardena” eskatzeko ordua dela uste du Unai Mendizabalek (Bilbo, 1974).

Herritar talde moduan agertu zarete, baina zein bilakaera izan duzue? Nola elkartu zarete?

Ez gara kolektibo bat, norbanakoz osatutako herritar talde bat baizik. Guztiok ibili izan gara hainbat herri mugimendutan, auzo elkarte eta beste hainbatetan. Gasteizko San Antonio kaleko lokalak direla-eta udalean egiten ari diren ikerketa batzordea aztertzeko elkartu ginen, asko kezkatzen gaituelako zigorgabetasunak halako kasuetan.

San Antonioko aferaren balorazioa ezagutarazteko egin duzue agerraldia. Nola ikusi duzue ikerketa batzordea izaten ari den ibilbidea?

Behingoagatik ikerketa batzorde bat eratu da, eta ez da gutxi, baina nahiko kritiko eta kezkaz ikusten dugu auzia. Jarraipena komunikabideetatik egin dugu; beraz, ez daukagu beste herritarrek baino askoz informazio gehiago. Kezkatuta gaude ikusita nola joan den ikerketa batzordea. Alfonso Alonso alkate ohiak esan du ez duela asmorik bertara joateko, eta egiten zaizkion galderak idatziz erantzungo dituela. Udalak jarrera hori babestu du, eta guri oso larria iruditzen zaigu. Horrek jarrera harroputza eta herritarrekiko begirunerik eza erakusten du. Zoritxarrez, baliteke erantzukizun politikorik ez ematea.

Hala ere, zuen eskaerak kasu honetatik harago doaz. Zer eskatzen duzue zehazki?

Gardentasuna. Erakundeen aldetik kudeaketa garden bat, eta guztionak diren ondasunak ez daitezela erabili interes partikular batzuei laguntzeko. Ikusi besterik ez dago; orain arte denon diruarekin interes jakin batzuk saritu dituzte. Gainera, gaur egungo krisi testuinguruan are gogorragoa da egoera; gerrikoa estutzeko eskatzen digute, baina egoera honetan egotea ez da herritarron erantzukizuna. Erantzukizuna dutenei, aldiz, oso merke ari zaie irteten hau guztia.

Adierazi duzue jendeak ere ez duela behar beste erantzuten. Zergatik izan daiteke?

Zaila da jakitea, baina, agian, arazoa da ez dugula erantzuteko bitarteko nahiko eta egokirik. Haserretu bai, baina nola bideratu eta egin zerbait baliagarria izan daitekeena? Hori da jendeak galdetzen duena, arrazoi guztiarekin. Manifestazio bat edo kale agerraldi bat askotan ez da nahikoa, ez baitute irtenbide zuzenik ematen beti. Gaur egun, eztabaida horretan gaude gu ere, taldeko kideok, hausnartzen zer egin dezakegun herritar bezala halako kasuak amaitzeko. San Antonioko ikerketa batzordea amaitutakoan baloratuko dugu zer egin eta nola jakinarazi gure ikuspuntua Gasteizko gizarteari.